Удавас статистика кылдырда мегелээшкин/махинация аргазы үнүп кээр. Угаан чок башкылар чүве бе? Мээң оглумнуң төрээн дылы — орус эвес!!!
Бо эртен садикке оглум чедирип чорааш, билдириишкин долдуруп турумда, ында бир чүүл сагыжымга кирбеди, өңнүктер!
Садиктиң эргелекчизи: "Садикте өөредилге дылы — орус дыл" — деп бижиир силер дээрге, арай сагыжымда ону хүлээксевейн олур мен де. Оон: "Төрээн дылы — база "орус дыл" деп бижип каар силер аа" — деп барды-ла.
Ол кандаай чүвел?! Мээң оглумнуң төрээн дылын ол билир чүве бе?
Дыка хөй ада-иелер эргелекчиниң аайы-биле "мээң төлүм төрээн дылы — орус" деп бижип каап турары илдең. Чаржынчыг! "Чок, мен ынча деп бижип шыдавас-тыр мен" — деп, туттуна-туттуна эвилең чугаалааш, "тыва дыл" деп бижээш тутсуп бээримге, чүү-даа дивейн хүлээп алды.
Кажан бир айтырыг туруп кээр болза, бодуң холуң-биле бодуң ынчаар бижээн боор сен. "Эргелекчи ынча диди" — деп мугаттынып олурар эвес сен.
Мээң оглум тывалаар кижи. Ам 2 хар чартык назылыг. Садикте башкыларынга: "Очур дыка тывалаар" — деп, мактадып-даа турар. Очурнуң барып турар бөлүүнден чүгле 5 тыва өг-бүле ажы-төлүнге тыва дыл өөредир күзелин илереткен билдириишкин бижээн болду. Бөлүкте 20 ажыг чаштар бар, оларның аразында 2 азы 3 орус чаштар бар. Арткан 15 тыва өг-бүле чүге ындыг билдириишкин биживээни чогум мээң херээм эвес, ынчалза-даа ооң чылдагаанын билип алыксаар-дыр мен. Чүге дизе оларның шиитпиринден мээң оглум тывалаар-тывалавазы база хамааржыр.
Хүндүлүг Владислав Товарищтайович, хүндүлүг Аяна Каң-ооловна, хүндүлүг Ирина Николаевна, хүндүлүг Елена Мандан-ооловна, хоойлу-дүрүм аайы-биле кандыг боорул? Шупту садиктерде негелде ындыг бе? Азы чүгле бистиң эргелекчивис эргезин улгаттырыпкан бе? Силерден дуза дилеп, кыйгырып тур мен. Таратчып көрүңер, чонум!
